Sot me fillim nga ora 14:00 Asociacioni i Gazetarëve të Kosovës do të mbajë kuvendin e jashtëzakonshëm për zgjedhjen e Kryetarit të bordit dhe anëtarëve të bordit të AGK-së.

Asociacioni i Gazetarëve të Kosovës inkurajon si dhe mirëpret kandidimin e çdo gazetari / gazetareje që ka vullnet, vizion dhe përkushtim për të punuar dhe kontribuar në të mirë të organizatës dhe komunitetit të gazetarëve.

Para pak ditësh, Bordi i Asociacionit të Gazetarëve të Kosovës i përbërë nga: Arsim Halili, Beadin Syla, Besiana Krasniqi, Dardan Hoti, Fidan Rama, Majlinda Aliu, Taulant Qenaj dhe Valdrin Krasniqi, kishte dhënë dorëheqje unanime për t’i hapur rrugë zgjedhjeve të përgjithshme të jashtëzakonshme të AGK-së.

“Ofrimi i dorëheqjes bëhet me qëllim të krijimit të parakushteve për sigurimin e mandatit të plotë tre vjeçar të kryetarit së AGK-së dhe shmangies së situatës për përsëritjen e zgjedhjeve pas 9 muajve për kryetar dhe anëtarë bordi, të parapara sipas kalendarit të rregullt”, thuhej në njoftim.

Grupi Koha (Koha Ditore, KTV, Koha.net, Tv Arta) ka vendosur që në zgjedhjet për anëtarësinë e re të Bordit të Asociacionit të Gazetarëve të Kosovës (AGK) të kandidojë me tre gazetarë. Gazetari i “Kohës Ditore”, Fitim Gashi, është përzgjedhur të jetë kandidat për kryetar të Bordit të AGK-së, ndërsa gazetarja e “Koha Visionit”, Ardiana Thaçi, dhe gazetarja e “Kohës Ditore”, Elvira Berisha, kandidate për anëtare të Bordit.

Kandidaturën për kryetar të AGK-së deri tani e kanë bërë publike edhe gazetarët Gentiana Begolli dhe Alban Selimi, që të dy punëtorë në RTK.