Është fare e lehtë që Telekomi i Kosovës,  të dal nga kriza në të cilën gjendet dhe se tashmë ka filluar një strategji e uljes së qirave dhe shkurtimit të marketingut. Kështu të paktën beson kryetari i Sindikatës së Telekomit të Kosovës Lamih Balaj.

 

Balaj në një intervistë për Informatat.com thotë se ata si sindikatë, janë të shqetësuar me gjendjen në Telekom, por se kjo kompani megjithëse gjendet në një gjendje jo të mirë, ajo nuk mund të falimentoj.

“Telekomi nuk po falimenton. Telekomi nuk është një kompani e cila falimenton. Është një kompani e cila i ka mbi 2300 punëtor të punësuar. I mban 2300 familje, i ka dhënë milionat Republikës së Kosovës, është tatim pagues me i rregullt në Administratën Tatimore të Kosovës edhe nuk falimenton. Sepse me falimentu Telekomi i Kosovës, falimenton vetë Republika e Kosovës. Sepse të gjitha institucionet shtetërore, janë të lidhura me Telekomin e Kosovës”, thotë ai.

Ndërsa pohon se gjendja jo e mirë në Telekom, ka ardhur si pasojë e konkurrencës jo lojale në treg. Nërkaq beson që kësaj çështje mund t’i japin zgjidhje, vetëm organet e drejtësisë.

“Unë besoj se Telekomit jolojaliteti, konkurrenca jo lojale në treg e operatoreve të ndryshëm, e ka pru në këtë gjendje. Sidomos atë që e kemi thënë në vazhdimësi e operatorit tonë virtual Z mobile, e cila ka punuar jo në mënyrë të rregullt dhe këtu është fajtor shteti, sidomos është Autoriteti Rregullativ, i cili është dashur me kohë me pa se çfarë është duke ndodhur. Sepse nuk ka askund në botë që një kompani e cila shet produkte për ty, të dal në treg dhe t’i zbres çmimet me lirë se sa ti. Do të thotë se është një punë e pështjelltë, të cilës mund t’i japin zgjidhje vetëm organet e drejtësisë”, ka thënë ai.

Ndërkaq thekson se në shkatërrimin e Telekomit, janë të involvuar njerëzit e institucioneve shtetërore.

“Është dikasteri i zhvillimit ekonomik ai i cili është dashur të jep përgjegjësi para opinionit publik, para Qeverisë, para Parlamentit. Sepse ai është dikaster i cili e udhëheq Telekomin e Kosovës. Aty e ka bordin  e ka menaxhmentin dhe përgjegjësi duhet të jep ai. Sigurisht është edhe faktori njeri, por atë faktorin njeri duhet me ndal dikush. Kush ia ka dhënë kompetencat atij faktori njeri. Kush e ka pru deri te ajo, kush ka lejuar të nënshkruhen ato kontrata, të cilat na kanë dëmtuar neve në vazhdimësi…Pak a shumë janë të involvuar sigurisht edhe njerëzit e institucioneve shtetërore në shkatërrimin e Telekomit”, thotë ai..

Balaj po ashtu pohon se shumë shpejt, do të duhej të hyjë në fuqi  kodi 383, e jo të shtyhet ne afat të pacaktuar, sepse këto mjete derdhen në xhirollogari të dikujt.

“Ne e dimë që kemi paguar miliona euro Monako Telekomit për shfrytëzim të 377. Ndërsa nëse hyn në fuqi 383 unë po u them nga kodi ndërkombëtar Telekomi do t’i shpëtoj dikund 20 milion të hyra gjatë vitit. Një mënyrë tjetër e strategjisë është ajo që investimet kapitale të përqendrohen ne avancimin e teknikes së re”, ka thënë ai./Informatat.com/