Dy partnerët e koalicionit, ata që thonin se i kishin dhënë mësim Serbisë me vendimin për taksën, dje gjatë ditës i shfaqën shkëndijat e para publikisht të thyerjes dhe dallimeve në qëndrime.

I pari, kreu i Qeverisë, Ramush Haradinaj, përmes një letre dërguar vendeve të Quint-it propozoi mbajtjen e një konference ndërkombëtare ku do të diskutohej për Kosovën dhe Serbinë, duke u krijuar kështu kushtet për heqjen e taksës, e pas tij, kryeparlamentari Kadri Veseli u takua me ambasadorin amerikan e propozoi pezullim të masës së 100 për qindëshit për 120 ditë.

PDK-ja e AAK-ja nuk po pajtohen me mendimet e njëra tjetrës, e si rrjedhojë, Haradinaj iu përgjigj Veselit se taksa nuk do të hiqet, edhe nëse kjo do të thotë prishje e marrëdhënieve me SHBA-në.

Për këto luhatje të partnerëve të koalicionit, ka folur për Gazetën Express, shefi i grupit parlamentar të Lëvizjes Vetëvendosje, Glauk Konjuca.

Konjufca deklaroi se ka parë të dy qëndrimet e liderëve të shtetit, duke i cilësuar të dy këto si të gabuara.

“Unë dje i pashë dy reagime, në të vërtetë letrën e kryeministrit i cili ua dërgoi faktikisht shteteve të jashtme dhe qëndrimin politik të Kadri Veselit që taksa duhet të pezullohet. Sa i përket të parës pra letrës që thelbi i së cilës ishte thirrje e një konferencë ndërkombëtare mendoj që është krejtësisht e gabuar sepse faktikisht kjo e vulos Kosovën si një projekt të pazgjidhur për të cilën ka nevojë me u mbajt një konferencë ndërkombëtare”, pohoi Konjufca, duke shtuar se problemi kryesor mes dy shteteve, atij serb dhe atij kosovar, është mosnjohja nga Serbia.

“Mendoj që problemi kryesor i Kosovës e Serbisë është mos njohja nga Serbia, mosnjohja e Serbisë ka qëllime politike dhe nuk ja vlen një konferencë ndërkombëtare për mosnjohjen e Serbisë, faktikisht vetë ideja do të ishte e rrezikshme sepse do ta vendoste në pikëpyetje shtetësinë e Kosovës do ta kategorizonte atë si një problem të pazgjidhur mes shteteve të botës në të cilin do të marrin pjesë të gjithë mirëpo si palë kryesore Kosova dhe Serbia e cila do ta kthente Kosovën përpara vitit 2008”, shtoi ai.

Ndër të tjera, shefi i grupit parlamentar të VV-së, tha se çfarëdo kompromisi që do të bëhej në këtë konferencë e prek shtetin e Kosovës.

“Në theksin ndërkombëtar vendimi i GJND-së është kapital dhe ne po e tretim këtë vendim duke dhënë ide si kjo e kryeministrit për konferenca ndërkombëtare, kjo e vendos në pikë pyetje statusin e Kosovës sepse i bie se Kosova ka problem shumë të madh me Serbinë i cili do të bëhet problem ndërkombëtar për të cilin duhet të ketë konferenca dhe ku dy palët do të pozicionohen me pozicionin e tyre pastaj meqë rast prej tyre kërkohet një far lloj kompromisi. Kompromisi mund ta prek në kurriz shtetin e Kosovës dhe ky është gabimi i kryeministrit pse e ka thirrë konferencën ndërkombëtare për Kosovën, mendoj që nuk ka nevojë për kurrfarë konference, ka nevojë që Serbia me e njoftë Kosovën dhe trysnia ndërkombëtare me u bo mbi Serbinë që me e njoftë Kosovën nuk ka pse i jep Kosova as territor as kurgjo sa i përket njohjes”, theksoi Konjuca.

Nga Lëvizja Vetëvendosje, këto qëndrime të kundërta po shihen më shumë si lëkundje e PDK-së, se sa e koalicionit qeverisës e se partia e Veselit edhe njëherë është duke u tërhequr nga fjalët e veta.

“Kjo është më shumë lëkundje e PDK-së, mund të jetë pastaj edhe lëkundje e koalicionit qeverisës, por është më së pari lëkundje e PDK-së, ishte PDK-ja ajo që shumë i dhanë zor edhe me pompozitet për taksën, bile bënin gara me Ramushin se kush ishte autori a ishte Enver Hoxhaj a të tjerët, apo ishte kryeministri Haradinaj, në të vërtetë tash PDK-ja po i han fjalët e veta gjë që s’është risi në skenën politike të Kosovës sepse ka ndodh shumë shpesh kjo nuk ka befason fare, tash ta shohim edhe kryeministri sa i përket kësaj ndryshimit të qëndrimit të partisë politike a do të shkojë edhe ai rrugës të cilën po e ndjek Partia Demokratike. D.m.th. ndryshimi i qëndrimeve shumë shpesh, bash qysh e ka thanë kryetari i Grupit Parlamentar të PDK-së duke i akuzuar të tjerët që po ndryshojnë sikur moti. Me të vërtetë ai më duket e kish pas për PDK-në për Veselin”, tha Konjufca.

Tutje, deklaratën e kryeparlamentarit Veseli për pezullim të taksës për 120 ditë ai e sheh si shantazh ndaj kryeministrit Haradinaj.

“E kuptova deklaratën e z. Veselit si shantazh ndaj kryeministrit Haradinaj që të hiqet taksa. Faktikisht i pari që e ka kërku heshtjen e taksës është presidenti i Serbisë Aleksandër Vuçiq dhe nëse prej këtij pozicioni që Vuçiq ka thënë që nuk do të shkonte në tavolinë të bisedimeve pa u hequr taksa, qeveria jonë e merr një vendim të tillë e pastaj e heq, e shkon në bisedime pa kurrë far pozicioni, pa kurrfarë kushti, kjo do të ishte debakël, për Qeverinë e Kosovës, për shtetin e Kosovës, por veçanërisht për kryeministrin Haradinaj që kur e mori taksën e shpalli si një lloj triumfi të paparë në historinë e pasluftës së Kosovës, nifar vendimi që nuk ka guxuar ta merr askush. Atëherë nëse asgjë nuk ndodh, e taksa vetëm hiqet e këta shkojnë në negociata me Serbinë, kjo do të ishte një fitore për Aleksandër Vuçiqin dhe një humbje shumë e madhe për Kosovën”, shtoi Konjuca.

Në fund, ai ka shtuar se është shumë e nevojshme që vendi të shkojë sa më shpejt në zgjedhje, por duke pohuar se Vetëvendosje nuk pranon asnjë Qeveri teknike./Express/