Vizitë e jashtëligjshme po cilësohet nga partitë opozitare, vizita në Bruksel e Presidentit të Kosovës, Hashim Thaqi, me homologun e tij serb, Aleksandër Vuçiq, transmeton Informatat.com.

Pavarësisht bazës ligjore, deputet e Kuvendit të Kosovës thonë se ata nuk dinë se çfarë ka biseduar presidenti në bisedimet e fundit në Bruksel.

Ata thonë se i pari i vendit nuk do të duhej të shkonte këtë vikend në Bruksel pa e marrë mandatin nga parlamenti.

Deputeti i Partis Social Demokrate (PSD), Dardan Sejdiu e cilëson si keqpërdorim të detyrës zyrtare, madje ai thotë se nuk di asgjë se çfarë u bisedua në takimin e fundit.

“Takimi i presidentit Thaçi me presidentin e Republikës së Serbisë është një takim , i cili është bërë pa mandate dhe si president ai po e keqpërdor këtë. Ne si parti Social Demokrate kemi treguar që vendi ku duhet ndërtuar konsensusi është kuvendi. Kuvendi është ai që legjitimon dhe përkrah presidentin për ta bërë një gjë të tillë”, ka thënë Sejdiu.

“Ne nuk dimë asgjë se çfarë u bisedua atje, përveç asaj që kemi parë në media. Kjo mendoj unë se është e paktë dhe e mangët”, shtoi Sejdiu.

Edhe deputeti tjetër nga Lëvizjes Vetëvendosje, Arbërie Nagavci, e cilësoi gabim shkuarjen e Thaqit në bisedimet e Brukselit me Serbinë.

Sipas saj, Thaçi ka shkuar atje për interesa personale.

“Duke qenë se ne jemi Republikë Parlamentare dhe rrjedhimisht kjo është përgjegjësi e parlamentit. Ai ka shkuar në këto bisedime thjesht të përfaqëson veten e tij. Ligjërisht ai nuk e përfaqëson Republikën e Kosovës”, tha Nagavci.

Nga ana tjetër, presidenti Thaçi pas takimit me Përfaqësuesen e Lartë të Bashkimit Evropain, Federika Mogherini dhe presidentin e Serbisë Aleksandër Vuçiq të kenë debatuar probleme të cilat janë shekullore ndërmjet dy vendeve.

“Realisht ka qenë më i vështirë sesa që po flas dhe më i rëndë por të gjithë duhet kuptuar që këto janë probleme një shekulli të grumbulluara prandaj unë nuk jam naiv të mendoj se do të gjejmë zgjidhje magjike të menjëhershme për të ardhmen”, ka thënë Thaçi para gazetarëve.

Por, i pari i vendit nuk ka treguar se për cilat tema konkretisht kanë biseduar.

Qeveria e Kosovës muaj më parë kishte proceduar në Kuvend platformën për bisedimet finale me Serbinë.

Por, ajo vendosi që ta tërheq atë nga parlamenti pas kundërshtimit të fuqishëm nga ana e partive opozitare.

Sipas partive opozitare, ky dokument i ekzekutivit ishte i varfër dhe nuk paraqet se cilat janë temat që duhet të diskutohen në Bruksel me palën serbe.

Qëndrimi zyrtar i Qeverisë Haradinaj ishte se bisedimet finale me Serbinë duhet të fillojnë pas miratimit të strategjisë në Kuvend.

Ndryshe, Kosova dhe Serbia që tetë vite kanë filluar negociatat për arritjen e një pajtimi. Gjatë këtyre viteve, Kosova ka nënshkruar disa marrëveshje, siç është ajo për menaxhimin e kufijve, marrëveshjen për fusnotën dhe atë për themelimin e Asociacionit të komunave me shumicë serbe./Informatat.com/