Sindikata e Bashkuar e Arsimit, Shkencës dhe Kulturës e Kosovës (SBASHK), kërkon që Ligji i pagave, të tërhiqet për rishikim dhe korrigjim. Në kërkesën publike të SBASHK-ut, thuhet se ata  dhe në takimet me ministrin Bytyqi e Jagcilar, kanë shprehur kundërshtimet e bazuara kundër versionit aktual të Projektligjit për pagat,  duke e konsideruar atë si degradues,  për  tërë sistemin arsimor, shkruan Informatat.com.

“Këtë kundërshtim  SBASHK-u e tregoi edhe në grevën e 7 shtatorit dhe në takimin me kryeministrin Haradinaj  e ministrat Bytyqi e Jagciular.  Nga ky takim SBASHK-u doli me premtimin se gjatë punës dhe debatit në Komisionin për Administratë  do të bëhet korrigjimi i projektligjit dhe se punëtorët e arsimit do të kenë vend meritor në të. Kundërshtimin e bazuar ndaj Projektligjit degradues  SBASHK-u e përcolli edhe në takim me znj. Stephanie Eble  dhe me  përfaqësuesit e FMN-së  dhe ishte vlerësim i përbashkët se ky projektligj ka humbur kuptimin  dhe qëllimin ngase nuk ka bërë nivelizim pagash, por si i tillë , ka krijuar dallime edhe më të mëdha”, thuhet në reagimin e  SBASHK-ut.

SBASHK-u  i është drejtuar me shkresa zyrtare e me të gjitha argumentet edhe anëtarëve të Komisionit Parlamentar  për Administratë  duke pritur reagimin e tyre pozitiv.

“Mirëpo,  duke parë se edhe sindikata të tjera kanë ngritur kundërshtimet e tyre  dhe  duke pasur shqetësimin e arsyeshëm se Komisioni parlamentar për Administratë  në këtë shumësi  presionesh e kërkesash  mund të mos e bëj punën si duhet, veprimi më i drejtë është që  Ligji i pagave  të tërhiqet për t’u kthyer  te sponzorizuesi ( Ministria e Administratës Publike) dhe të rishikohet e korrigjohet  në një atmosferë të qetë e duke u marrë në konsideratë  kërkesat e drejta  të SBASHK-ut, por edhe kërkesat e drejta të sindikatave tjera.  Në këtë përpjekje  që çështjet të rregullohen me dialog e angazhime të përbashkëta  SBASHK-un duhet ta mbështesin  dhe MASHT dhe Këshilli i Prindërve sepse ata publikisht e kanë thënë se kërkesat tona janë legjitime e të drejta. Nuk është mirë që ata të heshtin tani e pastaj të dalin  e të deklarohen kundër veprimeve sindikale.”, thuhet në kërkesen e SBASHK-ut.

SBASHK po ashtu  i drejton një këshillë  miqësore kryetarit të Komisionit parlamentar për Administratë dhe deputetit Nait  Hasani,  që t’i shqyrtojë me korrektësi kërkesat e SBASHK-ut , që i janë  dërguar atij dhe anëtarëve të tjerë të Komisionit,  dhe ta kuptojë drejt  alarmin, se do të ketë veprime sindikale në tërë sistemin arsimor, nëse  kërkesat e tyre lidhur me Projektligjin për pagat  anashkalohen. SBASHK-u e ka dëgjuar gjithmonë dhe do ta dëgjojë zërin e anëtarësisë e do të veprojë ashtu si thonë ata dhe  përgjegjës për atë që do të ndodh  janë ata që nuk duan t’i kuptojnë drejtë këto alarme e paralajmërime me kohë./Informatat.com/