Studentët e universiteteve publike,  përmes një aksioni simbolik para Ministrisë së Arsimit, ku kanë folur për ndërhyrjet politike në arsim, kanë kërkuar nga kryeministri Ramush Haradinaj që të ndërmarrë masa ndaj ministrit Bytyqi,  për siç thonë ata të gjitha skandalet, që ai ka shkaktuar që nga ardhja e tij në krye të MASHT-it. Në të kundërtën thonë se  ata do të ngrihen në protesta,  për të kërkuar shkarkimin e ministrit Bytyqi  nga detyra,  raporton Informatat.com.

Studentët para Ministrisë së Arsimit, kanë vendosur kriteret, të cilat duhet përmbushur,  për tu punësuar në këtë sektor, e që sipas tyre është libreza e partisë Nisma.

Milot Krasniqi, kryetar i Parlamentit Studentor të Universitetit të Prizrenit, tha se  ata  përmes këtij aksioni simbolik, po shprehin pakënaqësinë,  lidhur me zhvillimet në arsim.  Sipas tij gjendja aktuale në arsim, në të gjitha nivelet po rëndohet çdo ditë e më tepër dhe se ndërhyrjet politike në arsimin e lartë,  nga ana e ministrit Bytyqi janë shqetësuese dhe të papranueshme për të gjithë studentët, e të gjitha universiteteve publike në Kosovë.

“Jemi dëshmitar të ndërhyrjeve politike,  që po bëhen nga ana e s së ministrit Bytyqi, që nga zgjedhja e këshillit drejtues të universiteteve publike. Të gjithë anëtarët të dërguar në këto këshille,  janë anëtar të NISMAs. Zgjedhja  e rektorëve si në Universitetin e Prizrenit, zgjedhja e stafit akademik dhe jo akademik në universitete, zgjedhja e anëtarëve të Këshillit shtetëror të cilësisë, punësimi i militanteve të Nismës në qendrën studentore në Prishtinë, punësimi i militantëve të Nismas në  MASHT. Kriteret e vetme për punësim është libreza a partisë Nisma”, ka pohuar Krasniqi.

Sipas tij që nga ardhja e ministrit Bytyqi të gjitha konkurset kanë qenë të montuara, pasi që nga to janë zgjedhur, vetëm anëtarë të partisë Nisma.

“Të gjitha konkurset e shpallura, që nga ardhja e ministrit Bytyçit, kanë qenë të montuara. Dhe në këto konkurse janë zgjedhur anëtar të Partisë Nisma. Të afërm të ministrit, gruas së tij dhe të eprorëve,  të zëvendëskryeministrit Fatmir Limaj. Ne  kemi dëshmi dhe këto dëshmi janë publike në web faqen e MASHT-it. Që nga ardhja e ministrit Bytuqi të krye të MASHT-it, kjo ministri  është përballur me shumë skandale. I bëjmë thirrje kryeministrit Ramush Haradinajt që të kërkoj përgjegjësi dhe të marrë masa ndaj ministrit Bytyqi,  për të gjitha këto shkelje dhe skandale,  që kanë ndodhur që nga ardhja  e tij në krye të MASHT-it. Në qoftëse nuk do të merren masa nga kryeministri ndaj ministrit Bytyqi, për të gjitha këto shkelje,  studentët do të ngritën në protesta  dhe do të kërkojmë shkarkimin e menjëhershëm të ministrit Bytyqi”, ka thënë ai./Informatat.com/.