Ende pa pasur një datë për zgjedhjet e reja partitë politike kanë nisur garën në rrjetet sociale. Shkrime, video, fotografi nga takimet me qytetarë, për më shumë se një muaj janë duke u sponsorizuar në rrjetet sociale nga subjektet politike e nga zyrtarët e tyre.

Ekspertet e rrjeteve sociale brenda kompanive të marketingut në Kosovë, të cilët nuk kanë dashur të identifikohen me emra për shkak të raporteve me klientët e tyre nga radhët e partive politike, kanë bërë të ditur se një parti gjatë fushatës njëmujore shpenzon rreth 10 mijë euro për sponsorizimet në rrjetet sociale: “Facebook” e “Instagram”.

Por para zgjedhjeve përveç partive, sponsorizime bëjnë edhe individë të caktuar, të cilët janë pretendues për t’u zgjedhur deputetë. “Një person i tillë për sponsorizim shpenzon rreth 5000 euro për një muaj. Rreth 3500 euro shkojnë për fotografitë, videot ose shkrimet e sponsorizuara, kurse rreth 1000 – 1500 euro ndahen për personat, të cilët e realizojnë produktin që sponsorizohet. Do të thotë nëse realizohet një video, një pjesë e mjeteve shkon për sponsorizimin dhe pjesa tjetër për montazhën e shkruesin e tekstit që inkuadrohet në video”, ka thënë për “Zërin” njëri prej ekspertëve të rrjeteve sociale.

Ai më tej ka treguar për gazetën se për një fotografi të sponsorizuar më së paku shpenzohen 5 deri në 100 euro. Si rrjedhojë e kësaj pagese fotografia në fjalë mbërrin deri tek 20.000 persona.

Ndërkaq për një video mesatarisht shpenzohen 20-500 euro, me ç’rast ashtu siç bëjnë të ditur ekspertët e rrjeteve sociale, kjo video siguron të paktën 30.000 shikime. Por përveç këtyre partitë politik dhe individët e caktuar investojnë edhe në artikujt e publikuar nga mediet. “Nëse një politikan publikon në faqen e tij në ‘Facebook’ një link të një lajmi të publikuar nëpër media online, atëherë shpenzon rreth 20 euro nëse vendos ta sponsorizojë atë. Ky link i paguar për t’u shfaqur te publiku mbërrin te rreth 30.000 persona dhe klikohet nga afërsisht 2000 prej tyre”, ka potencuar ai.