Deputetja e Aleancës për Ardhmërinë e Kosovës, Time Kadrijaj, ka denoncuar atë që pretendon si përzgjedhje të paligjshme të ambasadorëve në Komisionin për Politikë të Jashtme dhe Diasporë, vetë është anëtare e tij.

Kadrijaj, në një konferencë për media tregoi se në shumë raste të përzgjedhjes së ambasadorëve në mungesë të prezencës fizike, kryetari i këtij komisioni, Haki Abazi, ka telefonuar deputetët për të shprehur votën e tyre, njofton Klankosova.tv.

Sipas Kadrijajt, kjo është në kundërshtim me rregulloren e Kuvendit.

Kadrijaj ka njoftuar se këto praktika ku votimi është kryer përmes telefonit janë përdorur në rastin e përzgjedhjes të të propozuarit për Konsull në New York, Blerim Reka e gjithashtu edhe gjatë votimit të kandidatit për ambasador në Kroaci, Martin Berishaj.

Ndër të tjera, Kadrijaj tregoi se për këtë çështje i është drejtuar kryesisë së Kuvendit dhe zyrës ligjore në këtë institucion, për interpretim dhe anulim të këtyre vendimeve, si dhe do të përgatitet lënda për padi në Gjykatë.