Kryetari i LDK-së, Lumir Abdixhiku, ka reaguar mbi procesin e aplikimit për punë në Korporatën Energjetike të Kosovës (KEK).

Abdixhiku është shprehur se për këtë kanë ftuar prokurorinë për të nisur hetimet dhe po shprehet kritik mbi veprimet e Vetëvendosjes, parti në pushtet, duke e akuzuar për nepotizëm masiv.

”Plot 4668 qytetarë tanë kanë aplikuar për 128 vende pune në Korporatën Energjetike të Kosovës – pra në KEK. Ky aplikim i tyre nuk kishte fare rëndësi, sepse vendet e punës ishin të parandara për 40 familjarë e 80 militantë partiakë të partisë në pushtet.

Ky është modeli i pushtetit në vend. Kapje e nepotizëm masiv i çdo vendi e çdo ndërmarrjeje pa dallim; dhe atë hapur e pa brengë. Ata që e arsyetojnë kapjen, që normalizojnë zëvendësimin e një kapësi me tjetrin, le t’iu flasin sot të katër mijë aplikantëve që janë refuzuar sepse s’kishin parti. Le t’i bindin tani – ata e familjet e tyre – se dëshpërimi e ikja nga ky vend nuk janë alternativë.

Sot, kemi ftuar prokurorinë të nisë hetimet mbi këtë proces skandaloz e korruptiv. Nesër do të dorëzojmë dhe kallëzim penal në prokurori. Kemi ftuar dhe menaxhmentin e KEK-ut të anulojë procesin në fjalë e t’i suspendojë të gjithë anëtarët e komisionit vlerësues dhe të rinisë kështu një proces të ri, të hapur dhe, mbi të gjitha, të drejtë.

Punësimet nepotike nuk janë të reja në vend. Në fakt, ato veçse të reja s’janë. Ky vend ka parë mjaft. Kam dënuar e do të dënoj çdo veprim të tillë, nga kushdo që bëhet, kurdo që bëhet ose është bërë. Jemi në politikë për t’i ndalur këto fenomene, jo ushqyer ato. Në rolin e tanishëm – në opozitë – edhe s’kam shumë mundësi të parandaloj kapjen e nepotizmin. Por në qeverisjen e ardhshme time, konkurset e tilla nuk do të kapërcejnë pa monitorim nga organizatat e pavarura – vendore e ndërkombëtare. Merreni këtë si zotim publik”.