Menaxhmenti i Aeroportit Ndërkombëtar të Prishtinës “Adem Jashari” ka larguar një numër të punëtorëve nga puna. Kryetari i Sindikatës së Punëtorëve të Aeroportit Ndërkombëtar të Prishtinës, Bashkim Latifi i ka thënë se punëtorët e shkarkuar nga puna janë grevistë të cilët janë larguar pa paralajmërim. Ndërkaq, Valentina Gara zëdhënëse e ANP “Adem Jashari” në një përgjigje për Gazetën Express ka thënë se nuk ka të bëjë me largim por me mosvazhdim të kontratave.

Në gusht të vitit 2019, punëtorët e Aeroportit Ndërkombëtar të Prishtinës kishin mbajtur grevë tre ditore si shenjë revolte për plotësimin e kërkesave të tyre.

Kryetari i Sindikatës së Punëtoreve të ANP “Adem Jashari” Blerim Latifi i tha të mërkurën Gazetës Express se të larguarit nga puna janë grevistët.

Ai tha se 35 punëtorë janë larguar pa paralajmërim.

“Nga puna janë larguar grevistët, nënkryetarët, anëtarët e kuvendit vetëm iu janë dhënë ID kartelat dhe u kanë thënë më nuk je në punë, pa paralajmërim dhe pa kurfar arsye, janë diku 35 punëtorë”, ka thënë Latifi.

Gazeta Express ka kontaktuar Aeroportin Ndërkombëtar të Prishtinës lidhur me këtë çështje.

Zëdhënsja e ANP “Adem Jashari”, Valentina Gara ka thënë për Express se punëtorët nuk janë larguar por vetëm nuk iu kanë vazhduar kontratat e punës.

“Këtu nuk kemi të bëjmë me largim por me mosvazhdim të kontratave të 28 punëtorëve që janë nga shërbime të ndryshme të aeroportit”, ka thënë Gara.

Kryetari i Sindikatës së Punëtorëve të Aeroportit ka paralajmëruar një konferencë për media në ora 13:00 lidhur me largimin nga puna të këtyre punëtorëve.

Sipas  nenit 71 të Ligjit të Punës thuhet që punëdhënësi duhet t’i njoftojë  paraprakisht me shkrim një muaj më parë të punësuarit dhe sindikatën e të punësuarve, nëse janë të anëtarësuar në sindikatë, lidhur me ndryshimet e planifikuara./