Bashkimit të Sindikatave të Pavarura të Kosovës i ka bërë thirrje Qeverisë që t’iu kushtojë vëmenedje edhe punëtorëve të vendit.

Sipas kësaj sindikate, qeveria duhet të merret me Projektligjin për Pagat.

“Në kohën kur lufta në Ukrainë po intensifikohet, dhe e ka angazhuar vëmendjen e fuqive të mëdha, të SHBA-së, të NATO-s dhe të BE-së, dhe ka nxjerrë në dritë mendësinë mesjetare të fqinjit tonë i cili haptas po kërcënon lirinë dhe integritetin tonë, ne Bashkimi i Sindikatave të Pavarura të Kosovës thërrasim partnerin tonë social, Qeverinë që përveç kujdesit të tejshtuar për ruajtjen e lirisë dhe të integritetit të vendit, të merret edhe me kërkesat e arsyeshme të punëtorëve dhe t’ju dalë krahë se vërtetë kanë nevojë dhe meritojnë një mirëqenie sociale ndryshe”.

“E thërrasim partnerin tonë social, Qeverinë që të merret më këmbëngulshim e më profesionalisht me hartimin e Projektligjit për Paga, duke i përfshirë edhe kapacitetet tona profesionale, dhe të hapë rrugë për pagën minimale e edhe për kontratën kolektive, për këto akte të rëndësishme e tejet të nevojshme juridike të cilat po tejzvarriten”.

“Kjo tejzvarritje nuk është aspak e mirë e sidomos kur është premtuar dhe është bërë marrëveshja e është marrë zotimi, na respektoni që të mund të kemi respekt të dyanshëm”,  thuhet në njoftimin e BSPK-së.