Nëse vihen në peshore dinjiteti e mirëqenia njerëzore dhe ekonomia e tregut, më shumë duhet të rëndojnë të parat.

Kështu po vlerëson qeveria, e cila, me këtë ide është gati edhe të ndërhyjë në ekonomi, një vendim ky i diskutueshëm për një treg të lirë.

Mbi këtë parim, qeveria do t’u vendos tavan çmimeve të disa produkteve bazike, për ta lehtësuar barrën e inflacionit te qytetarët. Masën e paralajmëruar nga kryeministri, të dielën, e sqaroi vartësi i tij në Financa, Hekuran Murati, të hënën.

“Të përcaktohet një marzhë e fitimit, dhe pastaj të caktohet tavani”, tha Murati të hënën, njofton Klan Kosova.

PDK opozitare, nëpërmjet Mërgim Lushtakut e quajti këtë ndërhyrje në tregun e lirë.

“Kushtetuta thotë se organizimi i shtetit është përmes tregut të lirë, dhe qeveria nuk mund të ndërhyjë me këto masa”, tha ai.

Tavanin po e vlerëson ndërhyrje në sistemin ekonomik edhe profesoresha Kosovare Ukshini, sipas së cilës, kjo nuk mund të bëhet njëanshëm por në bashkëpunim me bizneset.

Përplasje për këtë pati edhe në Kuvend, kur VV kundërshtoi heqjen e akcizës e TVSH-së për produkte bazike.

Pushteti është optimist se ky plan del mirë pasi vlerëson se deri tash rezultoi me sukses caktimi i tavanit të çmimit të derivateve.