Deputetja e PDK-së, Blerta Deliu-Kodra, në njëvjetorin e zgjedhjes së Vjosa Osmanit si presidente e Kosovës, tha se ka pasur raste kur interesat e qytetarëve janë cenuar, e kur kryetarja e shtetit, s’ka qenë mjaftueshëm e zëshme.

Pas mbledhje së Kryesisë, ajo tutje tha se si gardiane e kushtetutës, Osmani do të duhej të ishte në nivel të detyrës së saj.

“Disa herë kemi shprehur shqetësime lidhur me pozicionin e saj. Ajo do duhej që gjithmonë të paraqiste unitetin e shtetit, të jetë aty kur shqetësimet e qytetarëve janë tejet të larta e natyrisht të jetë e zëshme në pika që janë pika të agjendave tona të përditshme, sa i përket çështjes së energjisë dhe çështjeve të tjera për të cilat presidentja si gardiane e kushtetutës do të duhej të ishte në nivel të detyrës së saj”.

“Konsideroj që presidentja do të duhej që të ishte në nivel të detyrës jo vetëm kur ajo e konsideron që do duhej ta bënte një gjë të tillë, por sa herë që cenohen interesat e qytetarëve të Republikës së Kosovës. Besoj që ka raste kur këto interesa janë cenuar e kur presidentja s’ka qenë e zëshme mjaftueshëm”, tha ajo,