Dy zyrtarë doganorë janë në mesin e të arrestuarve gjatë operacionit “Pika” në Gjakovë e Prizren, nën dyshimin se kanë kryer veprat penale “mitmarrje” dhe “shpërdorim i detyrës apo autoritetit zyrtar”.

Këtë aksion të Inspektoratit Policor e ka mbështetur Dogana e Kosovës.

Përmes një komunikate për media, Dogana e Kosovës thotë se është mirënjohëse ndaj punës së Inspektoratit në hetimin e këtij rasti dhe do të vijojë me bashkëpunim të rregullt me Inspektoratin, policinë dhe institucionet tjera të zbatimit të ligjit.

Njoftimi i plotë:

Dogana e Kosovës ka mbeshtetur Inspektoratin Policor të Kosovës në operacionin e arrestimit të zyrtarëve të kufirit në Rajonet Gjakovë dhe Prizren, ku janë arrestuar edhe dy zyrtar doganor për dyshimet se kanë kryer veprat penale ‘mitmarrje’ dhe ‘shpërdorimi I detyrës apo autoritetit zyrtar’.

Dogana e Kosovës është mirënjohëse ndaj punës së Inspektoratit Policor në hetimin e këtij rasti dhe do të vijoj me bashkëpunim të rregulltë me Inspektoratin, Policinë dhe Insititucionet tjera të zbatimit të ligjit brenda dhe jashtë vendit.

Dogana e Kosovës zbaton politika rigoroze që dekurajojnë me efikasitet praktikat e korrupsionit dhe sjelljes jo profesionale si dhe do të ndërmarrë me prioritet veprime që synojnë luftimin e korrupcionit dhe praktika të dëmshme e sjellje jo profesionale.

Mbi këtë konsideratë, Drejtori i Përgjithshëm i Doganës ka ndërmarrë veprimin e suspendimit të menjëhershëm të zyrtarve doganor të arrestuar dhe do të filloj procedimin administrativ disiplinor.