Sportistë nga mbarë bota e kanë dënuar sot sulmin ushtarak të Rusisë ndaj Ukrainës, i cili nisi në orët e sotme të mëngjesit.

Por, atyre u është bashkuar edhe një sportist rus.

Fedor Smolov në fakt është njëri prej futbollistëve të parë rusë që kanë dalë haptas kundër sulmit ushtarak në Ukrainë.

“Jo, jo luftë”, ka shkruar sulmuesi rus i Dinamo Moskës në rrjetet sociale.

Shumë sportistë të huaj kanë mbetur të ngujuar në shtëpi apo në hotele në pjesë të ndryshme të Ukrainës.

Ata shpresojnë që sa më shpejt të gjendet një zgjidhje për t’u larguar nga vendi.

Aktivitetet sportive në Ukrainë janë anuluar dhe thuajse gjithçka është mbyllur.