Zyrtarët e lartë gjermanë kanë bërë të ditur se nuk do të lejojnë zbutjen e masave të mbylljes së ekonomisë së vendit në fillim të janarit, për shkak se vendi po përballet për herë të parë me një mijë vdekje brenda ditës.

Besohet se shifra është ngritur në këtë nivel për shkak të vonesave në raportim të rasteve fatale, por ekonomia më e fuqishme evropiane vlerëson se gjendja edhe ashtu është përkeqësuar në fundvit. Gjermania, me numrin më të lartë të popullsisë në Bashkimin Evropian, ka mbyllur restorantet, baret qendrat sportive dhe argëtuese më 2 nëntor. Mbyllja e pjesshme frenoi ngritjen e shpejtë të infektimeve të reja me koronavirus, por nuk ia doli t’i ulte shifrat sipas pritjeve. Nga 16 dhjetori, Gjermania i ashpërsoi edhe më shumë kufizimet. Masat e reja do të respektohen deri më 10 janar. Ministri i Shëndetësisë, Jens Shpan, ka bërë të ditur se gjatë 24 orëve të fundit, vendi ka regjistruar 1 mijë e 129 vdekje të lidhura me COVID-19. Kancelarja Angela Merkel dhe guvernatorët e 16 shteteve të Gjermanisë do të vendosin të martën për masat e reja.