Deputetja e LDK-së Valentina Bunjaku Rexhepi, në seancën e sotme të Kuvendit të Kosovës, ka drejtuar një varg akuzash për Qeverinë Haradinaj,  e cila sipas saj e ka futur vendin në krizë. Bunjaku tha se mësimdhënësit, të cilët kanë hyrë në grevë kanë të drejtë dhe se e tërë kjo pakënaqësi, ka ardhur si pasojë e ngritjes së pagës së kryeministrit, raporton Informatat.com.

“Është paralizuar arsimi para universitar. Greva do të ketë pasoja të mëdha. Fëmijët që mësojnë alfabetin, Abc në e jetës. Për shumë shkronja kanë mbetur mbrapa. Askush nga ne s’ka të drejtë t’i dëmtojë fëmijët tanë. Është vetëm një adresë e fajësisë. Është qeveria aktuale që rriti pagën vetes dhe irritoj sektorët tjerë. Kjo rritje e dyshimtë pezmatoi dhe zemëroi gjithë kategoritë tjera të shoqërisë. Vendimi i qeverisë ka krijuar reaksion zingjiror. Mësimdhënësit kanë të drejtë. Është e turpshme që të degradohen mësimdhënësit në këtë mënyrë”, tha ajo.

Por ishte deputeti Daut Haradinaj, i cili kishte kërkuar fjalën, por pas fjalimit siç e quajti ai historik,  të Bunjakut, tha se preferon të mos flasë. Ndërsa tha se fjalimi i Bunjakut ishte historik, vetëm se ajo nuk dinte ta lexonte atë.

“Po e tërheq fjalën. S’po ia prishi Valentinës, se e pat një fjalim historik. Por s’dijke me lexu. S’di kush ia ka shkrujt”, tha ai./Informatat.com/