Shefi i Grupit Parlamentar të LDK-së, Avdullah Hoti, duke iu referuar një vendimi të Qeverisë së Kosovës për uljen e akcizës për duhanin prodhim vendor, ka thënë se me këtë veprim, Qeveria po u thotë qytetarëve “konsumoni duhan vendor se është më pak i dëmshëm”.

Tutje, ai thotë se, siç ka mësuar nga mediat, në Kosovë ekziston vetëm një kompani prodhuese e duhanit, e “që është në bashkëpronësi të këshilltarit të Kryeministrit dhe një drejtori komunal nga partia e z. [Shpend] Ahmeti”.

“Kjo qeveri ka deficit të njohurive bazike për zhvillimin e ekonomisë. Kur kjo kombinohet me motivin e mbrapshtë për të përdorur pozitën publike për nevoja personale, atëherë pasojat janë fatale për pjesën më të madhe të shoqërisë. Qeveria e PAN-it e ka marrë edhe një “vendim të madh”, duke ulur akcizën në duhanin që prodhohet në Kosovë në vetëm 30% të çmimit të tregut, me arsyetim për të mbështetur prodhuesit vendor. Siç është raportuar në medie, në Kosovë ekziston vetëm një kompani prodhuese e duhanit, që është në bashkëpronësi të këshilltarit të Kryeministrit dhe një drejtori komunal nga partia e z.Ahmeti”, ka thënë Hoti në reagimin e tij të publikuar në Facebook.

Tutje, ai thotë se Qeveria Mustafa ka rritur dy herë akcizën në duhan, dhe qëllimi ka qenë dekurajomi i konsumit.

“Për sqarim, qëllimi primar i akcizës nuk është mbledhja e të hyrave për buxhetin e shtetit, por dekurajimi i konsumit të mallrave që dëmtojnë shëndetin. Prandaj, Qeveria Mustafa dy herë radhazi e ka rritur akcizën në duhan për të dekurajuar konsumin, me qëllim të mbrojtjes së shëndetit, si dhe për të barazuar akcizën në Kosovë me vendet e rajonit”, deklaron Hoti.

Me këtë vendim, sipas shefit të GP të LDK-së, “Qeveria e PAN-it praktikisht po ju thotë qytetarëve konsumoni duhan vendor se është më pak i dëmshëm”.

“Po të ishte qëllimi për të mbështetur prodhimin vendor, atëherë do të duhej të subvencionoheshin bujqit që prodhojnë duhanin. Bujqit do të rrisnin kultivimin e duhanit, duke ju mundësuar përpunuesve të duhanit të siguronin më lirë lëndën e parë dhe të dilnin në treg me çmime më të lira për duhanin e përpunuar”, ka përfunduar Hoti.