Kryeministri i Britanisë Boris Johnson ka thënë se “veprimet e pamatura të Presidentit Putin tani mund të kërcënojnë drejtpërdrejt sigurinë e të gjithë Evropës”.

Boris Johnson dhe Volodymyr Zelensky, zhvilluan një telefonatë pak pasi u përhap lajmi se shpërtheu zjarr në termocentralin bërthamor Zaporizhizhia në Ukrainën juglindore.

“Të dy liderët ranë dakord që Rusia duhet të ndalojë menjëherë sulmin e saj në termocentral dhe të lejojë akses të papenguar për shërbimet e urgjencës”, tha një zëdhënëse e Downing Street.

Johnson tha gjithashtu se Mbretëria e Bashkuar “do të bënte gjithçka që mundej për të siguruar që situata të mos përkeqësohej më tej”.

Ai po kërkon një takim urgjent të Këshillit të Sigurimit të OKB-së në orët e ardhshme dhe se Mbretëria e Bashkuar do ta ngrejë çështjen menjëherë me Rusinë dhe partnerët e ngushtë.