Kryetari në largim i Komisionit Evropian, Jean-Claude Juncker, tha se kryeministri britanik, Boris Johnson, ka thënë shumë gënjeshtra gjatë fushatës së referendumit për Brexit-in para tre vjetësh.

Në një intervistë lamtumirëse për revistën gjermane “Der Spiegel”, Juncker tha se është penduar që nuk i ka kundërshtuar arsyet e largimit të Britanisë nga Bashkimi Evropian në vitin 2016. Komisioni në atë kohë nuk kishte ndërhyrë për t’i dhënë këshilla kryeministrit të atëhershëm, David Cameron, nga frika se ato do të ktheheshin si bumerang në rezultatin e referendumit.

Juncker tha se ky ka qenë një gabim i madh, duke shtuar: “Shumë gënjeshtra janë thënë, përfshirë ato të kryeministrit të tanishëm, Boris Johnson, saqë ka pasur nevojë për një zë që do t’i kundërshtonte ato”.

Ai gjithashtu i fajësoi politikanët përkrahës të Bashkimit Evropian për rezultatin e referendumit, veçanërisht Tony Blair-in, për të cilin tha se BE-në e ka parë vetëm si projekt ekonomik dhe e ka lënë anash aspektin politik.

Sipas tij, Bashkimi Evropian sot është i rrezikuar nga nacionalizmi i çmendur. Juncker i komentoi edhe protestat për mbrojtjen e klimës, duke thënë se ato kërkesa nuk mund të përmbushen lehtë në realitet dhe se industria klasike duhet të vazhdojë të mbizotërojë në Evropë, shkruan “The Guardian”,