Kompania Kosovare për Distribuim me Energji Elektrike e njohur si KEDS, ka pranuar me shqetësim informatën se gjatë ditës së diel, derisa ekipet tona ishin duke intervenuar në rrjet në një lagje të Pejës, ata janë sulmuar nga një qytetar, i cili nuk ka lejuar punëtorët të kryejnë detyrën e tyre zyrtare, duke rrezikuar kështu edhe furnizimin me energji elektrike për konsumatorët tjetër të asaj lagje.

Në njoftimin e kësaj kompanie thuhet se i njëjti ka shkaktuar edhe dëme të aseteve të KEDS, me ç’rast ka dëmtuar shtyllën e vendosur nga punëtorët tanë.

“KEDS dënon fuqishëm këtë veprim derisa fton organet e drejtësisë të veprojnë konform kompetencave të tyre që ata të cilën bëjnë veprime të tilla të marrin dënimin e merituar. Ekipet tona në terren janë të përkushtuar maksimalisht që të kryejnë me përgjegjësi të plote detyrat e tyre derisa KEDS bën apel te konsumatorët që të bashkëpunojnë me ekipet në terren dhe në asnjë mënyrë të mos bëhen pengesë gjatë kryerjes së detyrës zyrtare”, njofton KEDS.