Këshilli Gjyqësor i Kosovës ka njoftuar se e ka suspenduar kryetaren e Gjykatës Themelore në Mitrovicë, Ljiljana Stevanoviq.

“Këshilli Gjyqësor i Kosovës (KGJK), njofton opinionit publik, se në mbledhjen e 281-të ka vendosur për suspendimin e  Kryetares së Gjykatës Themelore në Mitrovicë, nga pozita e saj si kryetare. Ky Vendim është marrë sipas kërkesës së Autoritetit Kompetent për Kryetar të Gjykatave, në përputhje me Ligjin për Përgjegjësinë Disiplinore të Gjyqtarëve dhe Prokurorëve, Ligjin për Gjykatat, Ligjin për KGJK, Kodin e Etikës dhe Rregulloren për Procedurën Disiplinore të Gjyqtarëve”, thuhet në njoftimin e KGJK-së.

“Me këtë rast, KGJK thekson se, Vendimi për suspendimin e Kryetares së Gjykatës Themelore në Mitrovicë, është marrë në kuadër të përgjegjësive kushtetuese dhe ligjore që ka KGJK-ja, dhe nuk paragjykon përfundimin e procedurës në raport me gjyqtaren, znj.Stevanović”.

KGJK-ja ka thënë se ky vendim është marrë pa asnjë ndikim politik, duke kërkuar që zyrtarët publikë të institucioneve të tjera të ruhen nga deklaratat mbi vendimet e këtij institucioni.

“Vendimi në fjalë është marrë pa asnjë ndikim politik, prandaj me këtë rast, KGJK u bën thirrje institucioneve dhe zyrtarëve publik të institucioneve tjera të përmbahen nga deklaratat për  vendimet e KGJK-së, pasi çfarëdo deklarimi publik nuk i kontribuon pavarësisë së gjyqësorit, si pushtet i pavarur”.