Kryetari i Kuvendit të Kosovës, Glauk Konjufca dhe ai i Maqedonisë së Veriut, Talat Xhaferin, janë duke mbajtur një konferencë të përbashkët për media, pas vizitës që ky i fundit po e bën në Kosovë.

Konjufca i tha Xhaferi që të ndihet si në shtëpinë e tij dhe se bashkëpunimi ndërmjet dy shteteve do të ndikojë në sigurinë e rajonit.

“Mirë se erdhe në Kosovë dhe Kuvendin e Kosovës, ndjehu si në shtëpinë tënde. Patëm një vizitë tejet të rëndësishme nga ana e kryetarit të Kuvendit të Maqedonisë së Veriut, që është shenjë dhe tregon edhe njëherë për afërsinë e nevojshme për bashkëpunimin e ngushtë që e kanë dy republikat tona në të gjitha fushat e jetës, por, mbi të gjitha edhe në ato që na presin në të ardhmen dhe sfidat tona të cilat do t’i kemi përballë në të ardhmen”.

Kryeparlamentari kosovar mes tjerash tha se është i lumtur që në të njëjtën kohë të dy këto Parlamente e miratuan rezolutën kundër pushtimit rus në Ukrainë.

“Deri tash relacionet tona të mira diktohen edhe prej natyrës së lidhjeve që e kanë popujt tonë me njëri-tjetrin të cilat shkojnë deri në lidhje familjare, pastaj edhe bashkëpunimi mes institucioneve ku mbahen mbledhje të shpeshta e nënshkruhen edhe marrëveshje mes vendeve tona”.

“Kuvendi ynë e miratoi në të njëjtën kohë me atë të Maqedonisë së Veriut rezolutën për Ukrainën në mbështetje të popullit të Ukrainës i cili po sulmohet padrejtësisë nga agresioni i Federatës Ruse ku nuk po kursehen as fëmijët”.

“Bashkëpunimi ynë do të thellohet edhe më tutje, ne kemi aq shumë të japim njëri-tjetrin dhe jem i aq afër njëri-tjetrit si fqinj dhe kemi shumë shkëmbime përpara nesh për të bërë. Kjo më bën që të mendoj se vetëm kështu do jemi më të bashkuar për të quar edhe rajonin përpara” tha Konjufca.

“Ne jemi shumë të gëzuar që po veprojmë me Maqedoninë e Veriut për të qenë plotësisht për sanksione që BE, Nato dhe ShBA po ia vendosin federatës ruse. Por, bashkëpunimi ynë me Maqedoninë e Veriut do të thellohet sepse kemi aq shumë t’i japim njëri tjetrit saqë më bënë optimist se sa më të bashkuar të jemi edhe rajoni do të jetë i sigurt” tha Konjufca.