Kryeministri i Maqedonisë së Veriut, Dimitar Kovaçevski, vlerëson se përfitimet e vendeve që janë bërë pjesë e “Ballkanit të Hapur” janë të mëdha dhe se kjo nismë është e duhura për rajonin.

“Mirësevini në perlën e Maqedonisë, në Ohër, mirësevini në nismën e “Ballkanit të Hapur”, kjo është një kohë e sfidave të mëdha që kërkojnë vendime të përbashkëta dhe kjo nismë është përkushtimi ynë për një rajon të qëndrueshëm për paqe, bashkëpunimin dhe zhvillim ekonomik. Ky është përkushtimi ynë për një jetë më të mirë të popujve tanë edhe nisëm e jonë për evropizim të rajonit. “Ballkani i Hapur” tashmë i jep rezultatet e para për qytetarët dhe për bizneset, po ashtu shiriti i gjelbër nëpër kufij lejon lëvizje sa më të shpejt të kamionëve që transportojnë produkte ushqimore dhe bujqësore”, është shprehur Kovaçevski.

“Institucionet tona janë në komunikim të vazhdueshëm që t’i heqim të gjitha barrierat e edhe këta shirita. Përfitimet nga “‘Ballkani i Hapur” dhe ndihma e ndërsjellë mes shteteve është duke u vërejtur si rezultat i marrëveshjes për veprim të përbashkët siç ishte bashkëpunimi në fikjen e zjarreve”.

“Ballkani i Hapur” si një ndër lidhshmëri dhe dinamikë rajonale fitoi mbështetje nga komiteti i biznesit dhe shumë vende të Ballkanit që u dakorduan se “Ballkani i Hapur” është platformë që i duhet rajonit”, u shpreh Kovaçevski.

Tutje, kryeministri maqedonas thotë se ky samit e çon bashkëpunimin mes vendeve në një tjetër nivel për krijimin e një tregu të vetëm.

“Ky samit na çon edhe më tej në bashkëpunimin tonë, shkëmbimet tona të ndërsjella, heqjen e barrierave dhe përafrimin e popujve tanë, tani e tutje ne do të vazhdojmë me hapa të madhej. Sot do të firmosim memorandumet dhe marrëveshjet e reja të bashkëpunimit, me njohjen e përbashkët e diplomave dhe titujve të marrë nga institucione të ndryshme – kështu do ta lehtësojmë procesin që të krijojmë një treg të vetëm” tha Kovaçevski.