Komisioni Qendror i Zgjedhjeve sot pritet të vendosë për liderin e Vetëvendosjes Albin Kurti dhe 46 kandidatët tjerë që kanë probleme me ligjin. Në mbledhjen e saj KQZ do të vendoset për certifikimin e partive politike bashkë me listat e kandidatëve.
Vendimi për certifikimin e tyre apo jo merret me shumicën e votave të anëtarëve të këtij institucioni. Lista me kandidatët e verifikuar nga Këshilli Gjyqësor i Kosovës i shkoi Komisionit Qendror të Zgjedhjeve të mërkurën.
Në rast se ndonjë subjekt politik apo kandidat nuk certifikohet, mund të paraqesë ankesë në PZAP, derisa çështja mund të shkojë deri në Gjykatën Supreme.
Periudha e ankesave dhe e vendosjes për to është paraparë të përmbyllet deri më 31 janar.