Kritikohet qasja e Bashkimit Europian ndaj qytetarëve të Republikës së Kosovës, pasi që BE-ja po ua mohon atyre të drejtën e lëvizjes së lirë përmes liberalizimit të vizave, për shkak se politika apo gjyqësori kosovar nuk i kanë kryer detyrat.

Kryetarja e Komisionit për Integrime Europiane, Blerta Deliu-Kodra, ka kërkuar që BE-ja të marrë veprime karshi tyre, e jo karshi qytetarëve.

Deputetët pranojnë se kanë presion të madh nga qytetarët, pasi që kërkesa kryesore e tyre aktualisht është liberalizimi.

“Është një presion i madh i tyre. Natyrisht se nëse dilni sot në sheshet e Prishtinës ose të secilit qytet të Republikës së Kosovës, kërkesë kryesore nga secili qytetar është liberalizimi i vizave.”

Kështu thotë për Radio Kosovën kryetarja e Komisionit për Integrime Europiane Blerta Deliu-Kodra, e cila njëherësh kërkon të mos dënohen qytetarët nga Bashkimi Europian.

“E kemi adresuar me të gjithë përfaqësuesit e shteteve të BE-së kur kanë ardhur, që nëse ka konsekuenca politike të merren veprime politike karshi personave, karshi nesh. Por, mos të ketë dënime për qytetarët e Republikës së Kosovës. T’ua bëjmë atyre të mundshme lëvizjen e lirë dhe veprimi ynë politik të mos ketë konsekuenca tek ata.”

Edhe deputetja e LDK-së, Vjosa Osmani, pajtohet që populli nuk duhet t’i bartë pasojat e gabimeve të politikës apo edhe të institucioneve të tjera, dhe se Bashkimi Europian nuk duhet t’i shkelë të drejtat njerëzore të qytetarëve të vendit.

“Shpresojmë shumë që këto shtete do ta kenë parasysh që dëmi më i madh është për rininë e Kosovës, është për qytetarët e Kosovës të cilët po mbesin të izoluar, dhe tek e fundit kjo është edhe çështje e shkeljes së të drejtave themelore të njeriut, sepse liria e lëvizjes është e drejtë themelore e mbrojtur jo vetëm në Kushtetutën e Kosovës por edhe në Konventën Europiane për të drejtat e njeriut.”

Kurse zyra e BE-së në Kosovë ende nuk i është përgjigjur pyetjeve tona pse u mohohet e drejta e lëvizjes së lirë për qytetarët e Kosovës, kur detyrat e kërkuara nga BE-ja i adresohen politikës kosovare dhe gjyqësorit./Rtk/