Një delegacion prej tetë deputetësh kosovarë janë për një vizitë zyrtare në Preshevë, Medvegjë dhe Bujanovc. Në kuadër të kësaj vizite ata sot u pritën në takim nga Kryetari i Komunës së Preshëvës, Shqiprim Arifi.

Arifi kërkoi prezencë dhe bashkëpunim më të madh nga Kosova. Pas kësaj deklarate u tha që takimi është i mbyllur për media.

Politikanët kosovarë që marrin pjesë në këtë takim janë Nait Hasani, Ismail Kurteshi, Arbërie Nagavci, Teuta Haxhiu, Valentina Bunjaku, Arban Abrashi dhe Valon Ramadani.

Nait Hasani tha për klankosova,tv se deputetët do të njihen për së afërmi me zhvillimet dhe kushtet e tyre në administratë, në pushtetit lokal, fushën e mediave, të zhvillimit të arsimit, njohjen e diplomave, furnizimin me literaturë dhe libra për nxënës të shkollave atje, interesimin për mësuesit dhe kushtet që i kanë dhe për ata që i kanë kryer studimet në universitete të Kosovës, por që punojnë atje, a po u njihet e drejta apo jo dhe sipas Hasanit si kërkesë është edhe heqja e kuotës për regjistrime në universitet.

Ai po ashtu tregoi se kërkesën për vizitën atje ia kanë dërguar përfaqësuesit në Beograd, i cili ua ka përcjellë autoriteteve serbe dhe ata e kanë pranuar, duke ua konfirmuar pardje dhënien e lejes.