Kryeministri i Kosovës, Albin Kurti, ua ka dorëzuar veteranëve të luftës së Ushtrisë Çlirimtare të Kosovës një propozim në lidhje me kërkesat e tyre për përfshirje në pagën minimale.

Ai ka propozuar që të hartohet një ligj i ri për vlerësimin dhe verifikimin e pjesëmarrësve në luftë.

Këtë e ka konfirmuar për Klankosova.tv Faton Klinaku, kryetari i Organizatës së Veteranëve të Luftës së Ushtrisë Çlirimtare të Kosovës.

Klinaku deklaroi se e kanë pranuar letrën e shefit të qeverisë për të cilën tha se do ta shqyrtojnë dhe më pas do t’i përgjigjen me shkrim.

“Shkresën e kemi marrë dje dhe do ta shqyrtojmë e pastaj do t’i përgjigjemi me shkrim. Do të diskutojmë me organet tona, sepse letra është vonuar për një muaj e gjysmë. Aty flitet për një ligj të ri, por derisa të bëhet ai duhet të rritet paga minimale dhe krahas kësaj edhe pensioni i veteranëve”.

Veteranët para një muaji e gjysmë, konkretisht më 16 qershor, kanë mbajtur protestë gjithëpopullore për të kundërshtuar miratimin e Ligjit për Pagën Minimale pa përfshirjen e tyre në këtë ligj.

Një ditë më pas, përfaqësuesit e OVL së UÇK-së janë takuar me kryeministrin Albin Kurti për të gjetur një zgjidhje, ku ky i fundit iu kishte thënë se do t’ua dërgojë një propozim me shkrim.