Kryeministri i Kosovës, Albin Kurti, ka thënë se ministrja e Industrisë, Tregtisë dhe Ndërmarrësisë, Rozeta Hajdari, nuk ishte duke vozitur me shpejtësi të madhe, kur kishte aksidentuar dy fëmijë, të dielën, në lagjen “Arbëria” në Prishtinë.

Ai, në një konferencë për media, ka theksuar se i vie keq për fëmijët që janë lënduar dhe u uroi shërim të shpejtë.

“Nuk kam informacione të tjerë përveç sqarimeve që i ka dhënë ministrja Rozeta Hajdari, më duhet të them se i besoj. Ajo ka qenë bashkë me motrën e saj, me aftësi të kufizuara”.

“Me aq sa e kam kuptuar nuk ka shenja të frenimit në asfalt, do të thotë se nuk ka pasë shpejtësi më tepër se sa duhet, kamerat e marketit janë aty besoj që gjithçka do të sqarohet shumë shpejtë”,ka thënë Kurti.