Kryeministri i Kosovës, Albin Kurti, ka thënë se java e fundit e marsit 1999 ishte përplot me vrasje e masakra të përditshme.
Ai ka thënë se Serbia në përgjithësi nuk i ndjek kriminelët e në veçanti disa prej përgjegjësve i afirmon lart në politikë e në shtet.
Kurti në Facebook ka shkruar se Kosova dergjet nga pasiviteti special i prokurorëve të saj dhe joefikasiteti edhe më special i gjykatësve të saj.
Sipas tij, të paktën më 29 maj 2019 e patëm amandamentuar Kodin e Procedurës Penale për të mundësuar gjykimin dhe dënimin në mungesë të kriminelëve, por as kjo nuk po sjell rezultate sa duhet.
“Avokati Bajram Kelmendi me dy djemtë në Prishtinë, Kryesindikalisti Agim Hajrizi e veprimtari i shquar Latif Berisha në Mitrovicë, masakrat në Krushë të Madhe e të Vogël, në Suharekë e në Izbicë e deri tek ajo në Lubeniq së cilës ia shënojmë përvjetori sot. Lubeniqi paraqet gjenocidin e kryer ndaj popullsisë civile, duke shtuar se mbi 80 persona janë ekzekutuar në këtë vend, përfshirë këtu Muhametin e vogël vetëm 18 muajsh. Shumë krime ndaj nesh e aspak drejtësi për neve ndonëse u bënë 22 vjet që prej atëherë”, ka thënë ai.
Kurti ka shkruar se familjet në Kosovë vuajnë, pa adresim të së vërtetës, pa zhdëmtim, restaurim dhe rehabilitim që do t’ua sillte sistemi i duhur i drejtësisë dhe strategjia e nevojshme e adresimit të së shkuarës.
“22 vjet pas luftës diskutimi mbi të kaluarën s’do të duhej të ishte në pikën ku është. Megjithatë, ne do të angazhohemi e të bëjmë më të mirën që mundemi e që dijmë për të mbyllur plagët e së kaluarës. Sepse vetëm ashtu mund të shikojmë qartë dhe ecim krenar kah e ardhmja. Ndryshe jo”, ka shkruar në Facebook.
Ndërkohë kryetari i AAK-së, Ramush Haradinaj, ka thënë se nderimi për viktimat është thirrje për drejtësi.
“Jemi në Lybeniq në përvjetorin e njërës së masakrave, dhe ende ka të pagjetur dhe bashkëkombasit tanë fëmijët janë masakruar në këtë vend dhe nderimi për ta është thirrje për drejtësi”, tha Haradinaj.