Kryeministri i Kosovës, Albin Kurti, ka thënë se Qeveria është e angazhuar që të drejtat e njeriut t’i vendosë në qendër të vlerave të bazuara në parime.

Pasi deputetja Labinotë Demi-Murtezaj, pyeti Kurtin se çfarë përmban agjenda e këtij viti për personat me nevoja të veçanta, kryeministri theksoi se do të plotësohet kuota për këtë kategori dhe se Ministria e Financave është duke punuar për Projektligjin.

“Qeveria e Republikës së Kosovës është e angazhuar që të drejtat e njeriut t’i vendosë në qendër të vlerave të bazuara në parime, në njërën anë të demokracisë dhe sundimit të ligjit dhe në anën tjetër të mosdiskriminimit dhe barazisë. Në fund të muajit nëntor e kemi shpallur vitin 2021, si vit i personave me aftësi të kufizuara në Kosovë. Ne synojmë të realizojmë të gjitha resurset tona për një vend me mundësi dhe qasje të barabartë. Kalendari i aktiviteteve i ka shtatë komponente. Nga fushat e shëndetësisë, edukimit dhe arsimit, punësimit, qasjes, mirëqenies sociale, kulturës, sportit si dhe drejtësisë e sigurisë”, tha Kurti.

“Secila komponentë  përmban aktivitete dhe veprime konkrete të cilat do të zbatohen nga institucionet në bashkëpunim të ngushtë me organizatat për mbrojtjen dhe promovimin e të drejtave për personat me aftësi të kufizuara edhe pse jemi në fazën fillestare të zbatimit të kalendarit, zyra për qeverisje të mirë në kuadër të ministrisë në bashkëpunim me të gjitha ministritë dhe organizatat ka filluar nismat e para të zbatimit të kalendarit për vitin 2022”.

Mes tjerash, Demi-Myrtezaj i tha Kurtit se kanë pasur ankesa nga personat shtatshkurtër, për të cilët ajo tha se jo gjithmonë u është njohur statusi.

“Sa herë që është diskutuar për personat me nevoja të veçanta kemi pasur në mënyrë të veçantë ankesa nga personat shtatshkurtër që jo gjithmonë u është njohur statusi i personave me nevoja të veçanta e që praktikisht ata janë të tillë. A keni ndërmarr diçka konkretisht në këtë drejtim?”, ishte pyetja e deputetes për kryeministrin.

“Ministria e Financave, Punës dhe Transfereve, që është duke punuar në projektligjin për vlerësimin, njohjen e statusit për fitimet dhe shërbimet për personat me aftësi të kufizuara është duke e trajtuar këtë çështje dhe padyshim që do të marrin edhe vëmendjen tonë këta persona.  Me ç’rast më lejoni të bëjë edhe një theks tek terminologjia se e pashë që ju thoni me nevoja të veçanta. Në gjuhën tonë ligjore e administrative është persona me aftësi të kufizuara, pavarësisht si do të jetë terminologjia, kuptimi do të jetë në nivel të duhur. Unë e kuptoj që s’ka persona me aftësi të pakufizuara, mirëpo megjithatë, në kuadër të legjislacionit tonë dhe të administratës sonë e kemi këtë terminologji, ndonëse më duhet të pranoj që emërtimit që ju përdorët kurrsesi nuk është më pak i saktë”, tha tutje Kurti.