Shefi i kabinetit të kryetarit të Kuvendit të Kosovës, Ilir Kërçeli, ka dalur me një sqarim rreth një fotografie të publikuar, në të cilën shihen nxënës të cilët mbajnë në duar fotografi të presidentes Vjosa Osmani por dhe kryeparlamentarit Glauk Konjufca.

Kërçeli thotë se një gjë e tillë ka ndodhur pa dijeninë e stafit të kuvendit, ngase janë kundër kësaj praktike që fëmijët të mbajnë në duar fotografi të figurave politike.

”Në këtë foto po shihen fëmijët duke mbajtur fotografinë e kryetarit të Kuvendit dhe Presidentes.

Pajtohemi që nxënësit e shkollave të ndryshme të Kosovës të bëjnë vizita në institucionet e Republikës së Kosovës dhe të njoftohen nga afër me punët e institucioneve të vendit. Një veprimtari e tillë ka ndodhur vazhdimisht edhe në të kaluarën. Mirëpo jemi kundër kësaj praktike që fëmijët të mbajnë në dorë fotografi të figurave politike.

Fëmijët e kanë botën e tyre të pastër dhe të pafajshme dhe duhet të mbahen larg fenomeneve të tilla. Por për këtë janë përgjegjes mësimdhënësit.

Shprehim keqardhje që një gjë e tillë ka ndodhur pa dijeninë tonë”.

Ndërkohë Klan Kosova mëson se ajo çfarë nxënësit mbajnë në duar, është një revistë me mbi 100 faqe e Kuvendit të Kosovës, që tregon për punën e legjislaturave në këto 20 vjet.

Të njëjtat janë të vendosura në ambientet e kuvendit, të destinuara për vizitorët.