Ish-mesfushori i Liverpoolit, Craig Johnston, beson se “The Reds” mund të bëjnë çfarë të duan tani dhe ai ia ka sugjeruar drejtuesve të klubit ta transferojnë superyllin e Barcelonës, Lionel Messin, pasi që argjentinasi e ka cilësinë në nivelin e Liverpoolit.

Liverpooli e arriti finalen e dytë radhazi të Ligës së Kampionëve falë suksesit të treguar mbrëmë kundër kampiones spanjolle, Barcelonës. Liverpooli e kishte humbur ndeshjen e parë me rezultat 3:0, mirëpo mbrëmë fitoi 4:0.

Përkundër mungesës së Mohamed Salahut dhe Roberto Firminos, Liverpooli arriti të kualifikohet në finale me rezultat të përgjithshëm 4:3, falë golave të shënuara nga Divock Origi dhe Georginio Wijnaldum.

Së fundi, Liverpooli e ka shitur Luis Suarezin dhe Philippe Coutinhon në Barcelonë, mirëpo Johnston beson se klubi anglez duhet të tentojë të transferojë lojtarë të nivelit më të lartë, si Lionel Messi i katalonasve.

“Ata janë duke e arritur qiellin dhe limitin e tyre. Në fakt, ata janë duke arritur përtej limitit të tyre, për shkak të skuadrës që e kanë. Shikojini emrat e Liverpoolit mbrëmë, pa yjet e skuadrës, dhe pa Suarezin e Coutinhon”, ka thënë Johnston.

“Ne duhet të mësohemi të mos e lejojmë shitjen e tyre. Ne duhet ta blejmë Lionel Messin! Ja sa të mirë do të ishim nëse do t’ia kthenim me të njëjtën monedhë Barcelonës. Është e mrekullueshme”.

Liverpooli është klubi i dytë më i trofeshëm në Angli, pas Manchester Unitedit, me 18 tituj të Premierligës dhe pesë tituj të Ligës së Kampionëve.