Ish-kryeministri i Kosovës, Isa Mustafa, ka thënë se presidentja Vjosa Osmani dhe kryeministri Albin Kurti janë fajtorët, të cilët i lanë qytetarët pa liberalizim të vizave.
Mustafa, përmes një postimi në Facebook, ka thënë që Osmanit dhe Kurtit, në vend të liberalizimit, duhet t’u jepen “medalje për mashtrim të popullit”.
“Me pas veç pak fytyrë, Vjosa Osmani e disa të tjerë në Qeveri e në Kuvend do ta mbyllnin gojën për liberalizimin. Presidentja Osmani, nuk u takua sot me bllokuesin e liberalizimit (Makron), ashtu siç u raportua. Por, dy bllokuesit e liberalizimit, Osmani dhe Makron u takuan në Bruksel. Gati më shkuan lotët kur e lexova deklaratën e Vjosës se vetëm asaj i është dashur viza për këtë takim në Bruksel. Çfarë ironie. Kjo mendon se populli e ka mbajtje mendjen e peshkut. Është Vjosa Osmani, Albin Kurti, Shpëtim Bulliqi e piromanët e tyre që në vitin 2015 e 2016, kur ne ishim në një pako me Ukrainën dhe Gjeorgjinë për liberalizimin e vizave, shpiknin të pavërteta për ta penguar ratifikimin si kusht të liberalizimit”.
“Sa njeriut të sëmurë, të papunë e nevojtar për të shkuar në perëndim i është refuzuar viza, e kjo nuk i ka brengosur këta që sot janë në pushtet. Edhe disa në opozitë! Por, këtyre në vend të liberalizimit duhet t’u jepen medalje për mashtrim të popullit. E lanë pa viza, e ua morën mbi 5o për qind të votave. Aferim”, ka shkruar Mustafa.