Njazi Thaçi, kushëri i presidentit Hashim Thaçi, i cili sot është zgjedhur zyrtarisht drejtori i ri Menaxhues i KEK-ut, është shprehur i lumtur që është zgjedhur në pozitën më të lartë të KEK-ut.

“Ndihem jashtëzakonisht i lumtur që po marr pozitën me të lartë të Korporatës nga një proces krejtësisht transparent dhe profesional. Ndihem shumë i lumtur, qe në dy fazat e intervistimit kam marrë vlerësimet maksimale nga të gjithë natarë e Bordit të Drejtorëve e po ashtu edhe të ekspertëve të Ambasada Britanike”, ka shkruar Thaçi në Facebook.

Ai ka thënë se do të angazhohet maksimalisht ta menaxhoj në mënyrën me të mirë të mundshme KEK-un.

“Të zbatoj në përpikëri strategjinë zhvillimore të Korporatës në përputhje të plotë objektivat e Aksionarit dhe në harmoni me ligjet në fuqi dhe me direktivat e BE-së për sektorin energjetik”, thuhet në postimin e Thaçit.

Për më tepër thotë se do të mbështes fuqishëm punëtorët të cilët ai ka thënë se i vlerëson që janë aseti me i çmuar i KEK-ut.

“Pa përkushtimin dhe punën e tyre të palodhshme për një dekadë nuk do të ishim Korporata me e suksesshme në vend. Së bashku do të vazhdojmë të jemi shembull për të arritur suksese edhe me të mëdha”, ka shkruar ai.