Malsor Bejtës, asamblist i iniciativës qytetare “4100” në Kuvendin e Skenderajt, mbase ia “kanë gërditur” të qenit asamblist dhe anëtar i Kuvendit pas ngjarjeve të rënda, të cilat kanë tronditur gjithë vendin kur ai ishte rrahur nga drejtori i Drejtorisë për Kulturë, Rini dhe Sport, Ramiz Shala, dhe nga rojat e kryetarit Bekim Jashari, në seancën e 28 shtatorit, në të cilën diskutohej për buxhetin e Komunës. Që atëherë asamblisti Bejta nuk është dukur më në sallën e Kuvendit dhe nuk ka marrë pjesë në asnjë mbledhje.

Ai që kishte nxitur incidentin, Ramiz Shala, i cili gjatë gjithë seancës së 28 shtatorit e ngacmonte me fjalë dhe i kërcënohej Malsor Bejtës nga vendi ku ishte ulur, jo fort larg kryetarit Bekim Jashari dhe kryesueses Fatbardha Haliti, vetëm pak ditë më vonë kishte aksidentuar veturën zyrtare të Komunës, pasmesnate, derisa kthehej nga një darkë, jo në Skenderaj, por në Fushë Kosovë. Ai është lënduar edhe vetë gjatë këtij aksidenti dhe aktualisht ndodhet duke u shëruar. Drejtorinë për Kulturë, Rini dhe Sport derisa të kthehet ai do të drejtojë Bekim Latifi, drejtor për Arsim në Komunën e Skenderajt./Zeri/