Organizata të shumta joqeveritare dhe ambasadorë të vendeve të Bashkimit Evropian kanë marrë pjesë në marshin e organizuar në mbështetje të popullit të Ukrainës.

Në këtë aktivitet mori pjesë edhe presidentja Vjosa Osmani.

Osmani tha se Kosova është e gatshme të presë refugjate nga Ukraina.

“Po, ka një kohë që e kemi adresuar këtë çështje që nga dita e parë e sulmit rus në Ukrainë. E kemi iniciuar këtë me institucionet relevante. Tashmë është miratuar edhe një rezolutë në Kuvendin e Kosovës dhe të gjitha ato kapacitete që i kemi ndërtuar për të pritur refugjatë nga Ukraina”.

E para e shtetit theksoi se Kosova është bashkuar me aleatët për t’i kërkuar llogari presidentit të Rusisë Vladimir Putin, për krimet e kryera në Ukrainë.

“Ne qëndrojmë fuqishëm me popullin e Ukrainës siç kemi qëndruar për gjatë gjithë historisë me popujt liridashës anekënd botës. Natyrisht, ato që po i përjeton populli i Ukrainës na rikthen kujtimeve e plagëve të rënda që janë shkaktuar mbi secilin qytetarë të Kosovës nga regjimi gjenocidal i Serbisë”.

“Prandaj edhe i jemi bashkuar botës demokratike, i jemi bashkuar aleatëve tanë jo vetëm për ta dënuar agresioni rus mbi Ukrainën, por në të njëjtën kohë për të kërkuar llogari për krimet e luftës dhe diktatorit Putin”.