Kandidatja për presidente nga Lëvizja Vetëvendosje, Vjosa Osmani, gjatë një tubimi elektoral në Shtime ka thënë se partitë e tjera politike do të shkojnë në opozitë të gjatë.

Osmani, gjatë fjalës së saj, falënderoi qytetarët, derisa tha se i kanë bashkuar forcat me Albin Kurtin për të luftuar ata që ia kanë katandisur ëndrrat qytetarëve.

“Faleminderit për këtë mikpritje kaq të ngrohtë. Kemi nderin që sot po ua dëshmoni të gjithëve që Shtimja nuk është bastion i atyre, por është bastion i ndryshimit. Faleminderit që po ua dëshmoni atyre që e ndalën “Qeverinë e Shpresës” që nuk ka forcë që do të na ndalë më. Faleminderit që po e dëshmoni që kurrë më nuk do t’i lejoni që t’iu mashtrojnë dhe të keqpërdorin besimin dhe votën tuaj”.

“Ne i kemi bashkuar forcat me Lëvizjen Vetëvendosje dhe kryeministrin tonë të ardhshëm Albin Kurti, për shkak se më shumë se për çdo gjë tjetër ka nevojë të luftojmë për ata që katandisën ëndrrat tuaja. Ata që menduan çdoherë për xhepat e tyre dhe asnjëherë për ëndrrat e juaja”.

“Të gjithë të tjerët do të shkojnë në opozitë të gjatë, pasi që Kosova ka nevojë të udhëhiqet nga njerëz të pakorruptuar”.

Osmani, mes tjerash, u zotua se besimin që do e marrin më 14 shkurt nuk do ta thyejnë asnjëherë, sepse “është gjëja më e shenjtë për ta”.