Misioni i Organizatës së Kombeve të Bashkuara në Kosovë (UNMIK) ka luajtur rol pozitiv, por tani që rezoluta 1244 nuk ka më asnjë vlerë dhe Kosova është një vend me një klimë ndër-etnike shumë të qetë, do duhet të transformohet në “shtëpinë e përbashkët të misioneve të OKB-së në Kosovë”.

Kështu ka thënë ministri i Punëve të Jashtme i Republikës së Kosovës, Behgjet Pacolli, pas një takimi pune me nënsekretaren e Përgjithshme të OKB-së për Çështje Politike, Amasadoren, Rosemary DiCarlo, bëhet e ditur përmes një komunikate për media.

“Me nënsekretaren e Përgjithshme të OKB-së për Çështje Politike, ambasadoren, Rosemary DiCarlo pata një takim pune, gjatë të cilit e informova për zhvillimet e fundit në Kosovë dhe i ofrova vizionin tonë për marrëdhënien e Kosovës me OKB-në. I thashë se UNMIK-u ka luajtur rol pozitiv, por tani që rezoluta 1244 nuk ka më asnjë vlerë dhe Kosova është një vend me një klimë ndër-etnike shumë të qetë, do duhet të transformohet në shtëpinë e përbashkët të misioneve të OKB-së në Kosovë”, ka thënë Pacolli.