Që nga mëngjesi i të premtes herët në Moskë dhe Shën Petersburg, policia ka kontrolluar burrat në stacionet e metrosë, shumë prej të cilëve janë ndaluar dhe thirrur për t’u paraqitur në zyrat e rekrutimit.

Banorët e Moskës dhe Shën Petersburgut po raportojnë në mediat sociale dhe për bastisjet e policisë, ndërsa postojnë foto dhe video që tregojnë oficerët e policisë që ndalojnë dhe friksojnë të rinjtë.

Në Shën Petersburg, policia dhe oficerët me rroba civile ndaluan burrat jashtë ndërtesave të banimit në lagjen Kalininsky të qytetit dhe gjetkë.

Në Moskë policia dhe zyrat e rekrutimit ruajnë rekrutët e mundshëm pranë qendrës tregtare Galaktika dhe të paktën 13 stacione metroje.

Presidenti rus Vladimir Putin njoftoi fillimin e rekrutimit të pjesshëm më 21 shtator, duke premtuar se do të thërrasë 300,000 njerëz nga kategoritë e caktuara të qytetarëve. Në fakt, rekrutimi ka qenë masiv dhe është kryer me shumë parregullsi. Shumë njerëz përpiqen ta shmangin atë. Sipas gazetarëve, vetëm në dy javët e para, më shumë se 200,000 njerëz nga 53 rajone janë dërguar në front. Autoritetet ruse kanë pranuar se pesë burra të regjistruar tashmë kanë vdekur në Ukrainë, ndërsa rreth 20 burra kanë vdekur në pikat e grumbullimit të trupave para se të arrinin në frontin ukrainas. /abcnews.al