Presidenti rus Vladimir Putin dhe oligarku Arkady Rotenberg janë shkarkuar nga të gjitha pozitat e tyre në Federatën Ndërkombëtare të Xhudos (IJF), tha organi drejtues i sportit në një deklaratë të dielën.

Vendimi vjen pasi kjo federatë njoftoi se kishte pezulluar rolin e Putinit si president nderi muajin e kaluar për shkak të konfliktit të vazhdueshëm në Ukrainë.

Federata Ndërkombëtare e Xhudos njofton se Vladimir Putin dhe Arkady Rotenberg janë larguar nga të gjitha pozicionet e mbajtura në Federatën Ndërkombëtare të Xhudos”, thuhet në deklaratën e fundit të përmbledhur në një rresht.

IJF është një nga një sërë organesh qeverisëse që i kanë hequr Putinit titujt e nderit sportiv që nga shpërthimi i luftës, raporton CNN, transmeton Klankosova.tv.

Taekwondo Botërore i hoqi Putinit rripin e zi të nderit i dhënë në nëntor 2013, ndërsa Federata Ndërkombëtare e Notit (FINA) tërhoqi Urdhrin e FINA-s që i ishte dhënë më parë presidentit rus në tetor 2014.

Rotenberg, ndërkohë, kishte qenë anëtar i komitetit ekzekutiv të IJF-së si menaxher zhvillimi që nga viti 2013.