Ylli kosovar ia siguroi fitoren Norwichin në FA Cup, shpreson ta ndihmojë ekipin në pjesën e dytë të sezonit.

Milot Rashica e ka nisur vitin 2022 me këmbë të mbarë.

Ylli kosovar u rikthye nga lëndimi që e la jashtë fushës së blertë për disa javë.

Dhe, ai la menjëherë shenjë duke e ndihmuar Norwichin në rrethin e tretë të FA Cup.

Vushtrriasi e gjeti golin e parë në fanellën e klubit anglez në fitoren 1:0 ndaj ekipit Charlton.

25 vjeçari ndihet i lumtur për golin dhe për fitoren, edhe pse tregohet modest.

“Të jem i sinqertë, nuk ka rëndësi në këtë pikë se kush shënon ose kush asiston. Nga tash e tutje, çdo ndeshje është si një finale për ne. Ne vetëm duhet të fitojmë sa më shumë pikë që mundemi”, deklaroi fillimisht përfaqësuesi kosovar për uebfaqen zyrtare të klubit.

Ai ka folur edhe për lëndimin që e la për një kohë jashtë fushës së blertë, përcjell “Gazeta Express”.

“Unë kisha probleme për afro gjashtë javë. E kisha një rehabilitim të mirë dhe shpresoj që gjithçka të shkojë mirë. Ishte mirë që luajta disa minuta. E fituam lojën dhe shënova gol. Shpresoj që kjo të na japë besim të madh, jo vetëm mua, por edhe ekipit. Pas një pushimi që e kishim, kjo na shërbeu dhe e nisëm mirë vitin”, shtoi ai.

Tash, vëmendja e tij është në Premierligë, që nga ndeshja e ardhshme ndaj West Hamit.

Sipas tij, Norwichi ka kualitet dhe se ai me shokë do të punojnë çdo ditë që të përmirësohen me rezultate, përcjell “Gazeta Express”.

Rashica ishte transferuar verën e kaluar nga Werder Bremeni në Norwich City.

Disa herë në Premierligë, ai është zgjedhur lojtari më i mirë i ndeshjes tek ekipi anglez.