Ambasadori i Gjermanisë në Kosovë, John Rohde, e ka dënuar sulmin ndaj policëve të Kosovës në veri të vendit.

Rohde përmes një postimi në Twitter, tha se i japin mbështetje të plotë për autoritetet e zbatimit të ligjit të Kosovës “për t’i sjellë autorët para drejtësisë”.

“E dënojmë sulmin e pestë të neveritshëm mbi Policinë e Kosovës në vetëm pak javë. Mbështetje të plotë për autoritetet e zbatimit të ligjit të Kosovës për t’i sjellë autorët para drejtësisë”, ka shkruar Rohde në Twitter.

Ndryshe një njësi patrulluese e Policisë së Kosovës u sulmua me armë zjarri mëngjesin e sotëm, derisa automjeti i tyre po qarkullonte nga Mitrovica në drejtim të kufirit të Bërnjakut.