Ish-presidenti i FIFA-s, Sepp Blatter, dhe ish-presidenti i UEFA-s, Michel Platini, do të dalin në gjyq në Zvicër për t’u përballur me akuzat për korrupsion.

Prokurorët zviceranë thonë se Blatter organizoi në mënyrë të paligjshme një transferim prej 2 milionë frangash zvicerane në xhirollogarinë e Platinit më 2011.

Blatter dhe Platini, të cilët u paditën në nëntor, i kanë mohuar akuzat. Nëse shpallen fajtorë, ata mund të dënohen me burg efektiv ose gjobitje.

Çështja u hap në shtator 2015 pasi FIFA, organi qeverisës botëror i futbollit, u vu nën akuza për korrupsion në përmasa të mëdha.

Komiteti Etik i FIFA-s nisi një hetim, më pas duke përjashtuar dhe detyruar të dytë të largoheshin nga pozicionet e tyre.

Çështja zvicerane përqendrohet në një kërkesë për pagesë për punën këshilluese që Platini bëri për presidentin e atëhershëm të FIFA-s, Blatter, mes viteve 1998 dhe 2002.

Prokurorët thanë se Platini kërkoi pagesën mbi tetë vjet pas përfundimit të veprimtarisë së tij këshilluese.

“Me përfshirjen e Blatter-it, FIFA i bëri një pagesë Platinit në shumën e përmendur në fillim të vitit 2011”, thanë më parë prokurorët.

Blatter dhe Platini akuzohen për mashtrim, përvetësim, “menaxhimi i pabesë i biznesit” dhe falsifikim dokumentesh.

Gjykimi do të nisë më 8 qershor, raporton BBC.