Dy bashkëkryesuesit e Delegacionit Shtetëror për Bisedimet me Serbinë Fatmir Limaj e Shpend Ahmeti të martën në Bruksel do ta takojnë ekipin e ndërmjetësueses Federica Mogherini. Por edhe ky takim do të jetë vetëm konsultativ, madje as anëtarët e ekipit negociator nuk e dinë saktësisht se për çfarë do të bisedojnë me kabinetin e Mogherinit.

Analisti politik Artan Demhasaj ka thënë se nuk priten rezultate nga takimi i ekipit në Bruksel me Mogherinin ku aty nuk do të jetë pala tjetër dialoguese, sipas tij një takim i tillë mund të quhet vetëm monolog.

“Përderisa kemi kushtëzim të tillë nga Serbia për shkak të taksës dhe përderisa ata nuk marrin pjesë nuk mund të flasim për dialog sepse për të pasur një dialog duhet të jenë dy palët dhe kur nuk është pala tjetër dialoguese, atëherë ai nuk është dialog, vetëm mund të jetë thjesht një monolog i ekipit negociator”, theksoi Demhasaj.

Tutje ai shtoi se ekipi duhet ta rrisë transparencën në këtë proces dhe t’i bëjë publike agjendat që ka.

“Mendoj që duhet të ketë transparencë 100% në procesin e dialogut me Serbinë në rast se grupi negociator ka një agjendë, e cila u është dërguar nga Brukseli dhe ata nuk e bëjnë publike. Mendoj që kjo do të ishte e papranueshme për arsye se qytetarët e Kosovës duhet të jenë të informuar se çka po ndodh në procesin dialogues dhe nuk duhet të vazhdohet me një nivel të tillë të jotransparencës, siç ka ndodhur edhe në proceset e kaluara dialoguese”, ka thënë Demhasaj./Zëri/