Konferenca e parë statusore, në rastin kundër katër anëtarëve të Shtabit të Përgjithshëm të UÇK-së, do të mbahet të sot (e mërkurë), në orën 11:00, para gjyqtarit të procedurës paraprake të Dhomave të Specializuara në Hagë.
Prokrouria e Speciales me qëllim të konfirmimit të aktakuzës, është mbështetur në 153 dëshmitarë dhe synon që përsëri të mbështetet në shumicën e tyre gjatë gjykimit.
Sipas prokurorisë, materiali mbështetës për aktakuzën e paraqitur për konfirmim, ka pasë mbi 40 mijë faqe.
Në këtë konferencë, pritet që prokuroria të tregojë se çfarë lloji të provave disponon.
Sipas një parashtrese të Prokurorit të Specializuar dërguar Dhomave të Specializuara, të publikuar në faqën e tyre të internetit, prokuroria pretendon se për konfirmimin e aktakuzës ka disponuar me material prej rreth 43 mijë faqe, duke përfshirë raporte, deklaratat të dëshmitarëve, fotografi, e mbi 20 orë material audio-vizuel.
Sipas parashtresës së Prokurorisë, ajo parashikon sigurimin e hollësishëm të materialit me prova për mbrojtjen deri më 30 prill 2021, kurse shton se do të jetë në gjendje t’i ofrojë listën e plotë të dëshmitarëve deri më 31 maj 2021, me kusht që procedurat aktuale paraprake pranë Dhomave të Specializuara të jenë afër përfundimit dhe se në të njëjtën kohë është planifikuar fillimi i gjykimit.
“Prokuroria aktualisht parashikon shtimin e afërsisht 50 dëshmitarëve të tjerë në listën e dëshmitarëve për gjykimin, megjithëse numri përfundimtar i dëshmitarëve mund të ndryshojë, varësisht nga rezultati të hetimeve të mbetura”, thuhet në këtë parashtresë.
Katër eprorët e UÇK-së janë paraqitur javën e shkuar për herë të parë para Gjykatës Speciale.
Më 9 nëntor, Krasniqi dhe Thaçi ishin të parët që u paraqitën para gjykatës me seli në Hagë me ç`rast u deklaruan të pafajshëm për të gjitha pikat e aktakuzës.
Një ditë më pas të martën e 10 nëntorit, edhe Kadri Veseli pati paraqitjen e parë para kësaj gjykate ku u vetëdeklarua i pafajshëm, kurse Rexhep Selimi ishte i fundit që u përball me Specialen më 11 nëntor ku gjithashtu u deklarua i pafajshëm për akuzat që rëndojnë ndaj tij, njofton Klan Kosova.
Ata akuzohen për krime lufte.