Ministri i Punëve të Brendshme, Xhelal Sveçla, ka thënë se në veri s’do të ketë rrugë ilegale, dhe se po bëhen planifikime të nevojshme për rrugë të reja të cilat nuk e bëjnë të domosdoshme kalimin nëpër territorin e Serbisë.

Duke raportuar në Komisionin për Siguri, Sveçla bëri të ditur se ka pasur iniciativa të institucioneve që të hapet një kufi i tretë në rrugën e Izvorit, por ai shtoi se nuk ka gatishmëri nga Serbia që kjo të realizohet.

“Ne kemi dy pika kufitare në atë zonë, Bërnjakun dhe Jarinjën. Kemi edhe iniciativa të institucioneve tona që të hapim të tretin në rrugën e Izvodit. Nuk ka gatishmëri nga Serbia që kjo të realizohet. Kjo është një dëshmi se institucionet e Kosovës më shumë brengosen për kalimin ilegal të njerëzve nëpër kufirin midis dy shteteve. Jam i gatshëm bashkë me policinë që të hapim sado pika kufitare që të jetë e nevojshme për t’iu shërbyer qytetarëve atje, por kjo bëhet në marrëveshje mes dy vendeve, s’mund të lejohet shfrytëzimi ilegal i atyre rrugëve, as ju e as unë s’mund të shkojmë ilegalisht në Maqedoni apo në Serbi e Shqipëri, ka rregulla, ka vendkalime zyrtare që mund t’i shfrytëzojmë”.

Deputeti i Listës Serbe, Sllavisha Simiq, e kritikoi operacionin në veri për mbylljen e rrugëve alternative, e sidomos për vendosjen e barrierave duke hapur gropa, me arsyetimin se ato janë rrugë që lidhin fshatrat dhe kështu po pengohet lëvizja e banorëve. Ai u ankua se operacioni u krye pa kooordinim me policinë dhe pushtetin lokal.

Sipas tij, është gabim edhe qasja e politikës karshi veriut.

“I ftoj të gjithë akterët politikë, që të mos e kriminalizojnë veriun. Përndryshe veriu, në raport me të gjithë 7 rajonet tjera, e ka nivelin më të ultë të kriminalitetit”, tha ai.

Por, ministri mohoi se po kriminalizon veriun, por konfirmoi se atje ka vetëm operacione kundër krimit.

“Nëse janë 70 rrugë, edhe 70 kemi me i mbyll. S’ka rrugë ilegale. Jemi të gatshëm të shtojmë numrin, ai që do të shkojë për dializë ta ketë mundësinë të zgjedhë. Askush s’po e kriminalizon veriun, nuk ka ankesa nga qytetarët që në atë zonë policia po sillet në mënyrë diskriminuese, as nuk kemi thënë se filani apo fisteku është fajtor për sulmet që kanë ndodhur. E dimë kush po e sjell atë klimë të sulmeve dhe është presidenti serb i cili ka thënë kur ne kemi bllokuar rrugën të kontrabandimit, ka thënë se do të kontrabandojmë mallra ndryshe. Pra, drejtpërdrejt e ka mbështetur kontrabandën dhe kjo mbështetje tregon klimë të tillë për sulme.

Sveçla u zotua se shumë shpejt do të zbulohet se kush e ka sulmuar policinë.

“Do të ketë rezultate. Policia e ka gjithë mbështetjen jo veç politike por edhe logjistike e profesionale siç e kanë edhe të shumë aleatëve tanë që këto raste të zbardhen. Përgjegjësit patjetër që do t’i sjellim para drejtësisë, për këtë ne s’kemi përvoja të mira. Ka pasur dhjetëra sulme që kanë ndodhur më herët në atë zonë dhe askush nuk është përgjigjur. Është vrarë Enver Zymberi, është vrarë zyrtari i Eulexit, janë sulmuar institucionet, janë djegur pika kufitare, janë djegur qendra të regjistrimit civil, ka pasur shkelje të ligjit që nuk janë zbuluar. Kësi lloj imuniteti ndaj ligjit s’do të ketë më. Kushdo që është i përfshirë në aktivitete kriminale, secili që shkel ligjin ne do të angazhohemi maksimalisht që ta vendosim para drejtësisë, pa diskriminim, pa kurrfarë dyshimi dhe asnjë anashkalimi. Askush s’është mbi ligjin”, tha ai.