Presidenti i Kosovës, Hashim Thaçi, ka mirëpritur miratimin e rezolutës “Bytyqi” nga senati amerikan për vëllezërit Bytyqi duke thënë se ky është një inkurajim edhe për Kosovën që të kërkojë drejtësi për të gjitha viktimat e regjimit serb.

Ai gjithashtu tha se ky vendim i senatit amerikan tregon që kur është në pyetje Kosova, SHBA-ta janë një pa dallim.

“E mirëpres miratimin e rezolutës “Bytyqi” nga Senati i SHBA-së, që shpreh pakënaqësi me vonesat që po bën Serbia në dënimin e fajtorëve për vrasjen e vëllezërve Bytyqi nga aparati shtetëror serb në vitin 1999”, ka shkruar Thaçi në Facebook.

“Kjo mundëson që të shtyhet përpara çështja në instancat më të larta të SHBA-së, por gjithashtu tregon se kur është në pyetje Kosova, SHBA-ja është një, pa dallime partiake. Për ne është inkurajim që të vazhdojmë të kërkojmë drejtësi për të gjitha viktimat e regjimit serb në Kosovë dhe se drejtësia për vëllezërit Bytyqi më në fund do të vihet në vend”.