Deklarimi zyrtar nga autoritetet maqedonase se në shtetin e tyre jetojnë vetëm 3 mijë e 504 bullgarë nga 2.097.319 persona të numëruar ka shkaktuar tërmet politik në Sofje.

Kryetari i një prej partive kryesore në qeverinë bullgare, Slavi Trifonov tha se shifrat janë absurde kur dihet se mbi 100 mijë qytetarë të Maqedonisë së Veriut kanë marrë pasaporta bullgare dhe 30 mijë të tjerë janë në proces.

Sipas ligjeve bullgare, që një shtetas i Maqedonisë së Veriut të marrë pasaportën bullgare, ai duhet të vërtetojë rrënjët e tij bullgare. Sipas Trifonov, nëse Maqedonia e Veriut dëshiron të jetë pjesë e Bashkimit Evropian, atëherë qytetarët e saj do të duhet të deklarojnë lirshëm përkatësinë e tyre kombëtare. Shifrat e publikuara në Shkup ku u deklaruan vetëm 3 mijë e 504 bullgarë në regjistrimin kombëtar të popullsisë e ka kundërshtuar edhe Akademia e Shkencave në Sofje.

Nuk ka ndryshim në qëndrimin e Bullgarisë për pranimin e Maqedonisë së Veriut në negociatat për anëtarësim në Bashkimin Evropian. Kjo situatë ka vënë në pikëpyetje të madhe nëse qeveria aktuale bullgare do të ndryshoje qëndrim për negociatat ndërsa kushti kryesor i saj ishte përfshirja në kushtetutë e bullgarëve që jetojnë në Maqedoninë e Veriut ku vetëm shqiptarët rezultuan mbi 20%. Për momentin nuk ka afate se kur qeveria bullgare do të heqë veton ndaj Shkupit që mban peng edhe Shqipërinë. Autoritetet bullgare  thonë se negociatat në nivelin teknik janë duke vazhduar dhe po bëhet përparim në marrëveshjet për bashkëpunimin akademik kulturor si dhe nisjen e linjës ajrore të planifikuar Sofje-Shkup, shkruan Klan News.