Ushtruesi i detyrës së kryetarit të OVL-UÇK-së, Faton Klinaku ka thënë se nuk gjetur gjuhë të bashkëpunimit gjatë takimit me kryeministrin Albin Kurti.

Klinaku kërkoi nga qeveria që ta plotësojnë kërkesën e tyre.

“Ashtu siç nuk e kemi pranuar okupimin, nuk e pranojmë diskriminimin as politizim të çështjes së veteranëve, 23 vite pas luftës. Në takim me kryeministrin Kurti nuk kemi gjetur gjuhë të përbashkët. Kurti vazhdon të insistojë në qëndrimet e tij diskriminuese me tendencë politizuese ndaj çështjes së veteranëve dhe nuk plotësojë kërkesën tonë që është minimale”, është shprehur Klinaku.

“Kryeministri ka premtuar se do të dalë me propozim për të zgjidhur këtë çështje, dhe ne ju kemi dhënë kohë qeverisë dhe kuvendit”, shtoi ai.

Ai paralajmëroi protesta nëse nuk ka ndryshim të këtij vendimi në lidhje me Ligjin e Pagave.

“Ne i japim kohë që deri në lexim të dytë ta përmirësojnë gabimin e diskriminimit të veteranëve, nëse diskriminimi vazhdon, atëherë ne sot paralajmërojmë protestë ditën që do të mbahet seanca e kuvendit për pagën minimale”.